Ajay Kandewar,Wani:- वणी नगरपरिषद निवडणुकीच्या अनुषंगाने प्रभाग क्रमांक ८ मध्ये आज नगराध्यक्ष पदाच्या उमेदवार डॉ. संचिता नगराळे आणि स्थानिक नगरसेवक पदाचे उमेदवारांच्या प्रचारार्थ आयोजित कॉर्नर सभेला नागरिकांनी उत्स्फूर्त प्रतिसाद देत प्रचंड गर्दी केली होती.शिवसेना (उद्धव बाळासाहेब ठाकरे), महाराष्ट्र नवनिर्माण सेना, भारतीय राष्ट्रीय काँग्रेस,संभाजी ब्रिगेड व मित्र पक्षांनी एकत्र येऊन ही निवडणूक शहरातील मूलभूत समस्यांना घेऊन लढण्याचा निर्धार केला आहे. डॉ. नगराळे यांच्या नेतृत्वाखालील या सर्वपक्षीय आघाडीला जनतेचा मोठा पाठिंबा मिळत असल्याचे प्रभाग ८ मधील या सभेने सिद्ध केले.
मतदारांनी अभूतपूर्व गर्दी करून निवडणुकीतील परिवर्तनाचे स्पष्ट संकेत दिले. या कॉर्नर सभेला शिवसेना (उद्धव बाळासाहेब ठाकरे) पक्षाचे आमदार संजय देरकर, महाराष्ट्र नवनिर्माण सेनेचे नेते राजू उंबरकर, तसेच काँग्रेस पक्षाचे संजय खाडे, राजू कासावार, संजय निखाडे, सुनील कातकडे, धनंजय त्रिंबके यांच्यासह प्रमुख पदाधिकारी व कार्यकर्ते मोठ्या संख्येने उपस्थित होते. उपस्थित सर्व नेत्यांनी नागरिकांशी संवाद साधताना वणी शहरातील रस्ते, वीज, आरोग्य आणि शिक्षण यांसारख्या मूलभूत सुविधांचा अभाव हाच निवडणुकीचा केंद्रबिंदू असल्याचे स्पष्ट केले. या चार प्रमुख मुद्द्यांवर आजची कॉर्नर सभा गाजली. नागरिकांनी आपल्या दैनंदिन समस्या थेट नेत्यांपर्यंत पोहोचवल्या. आमदार संजय देरकर आणि राजू उंबरकर यांनी आपल्या भाषणात, शहराच्या विकासाची गती वाढवण्यासाठी आणि या समस्यांवर ठोस व कायमस्वरूपी तोडगा काढण्यासाठी सर्वपक्षीय उमेदवारांना व नगराध्यक्ष पदाच्या उमेदवार डॉ. संचिता नगराळे यांना प्रचंड मताधिक्याने विजयी करण्याचे कळकळीचे आवाहन केले. या सभेतील गर्दी आणि विकास केंद्रित मुद्दे पाहता, वणी नगरपरिषदेत परिवर्तन अटळ असल्याचे संकेत मिळाले आहेत.
