Ajay Kandewar,Wani:- वणी नगरपरिषद निवडणुकीचा तापता माहोल आणखी रंगत चालला असतानाच महाविकास आघाडीच्या अधिकृत नगराध्यक्ष पदाच्या उमेदवार डॉ. संचिता विजय नगराळे यांच्याबाबत महिलांमध्ये ‘नापसंतीचा सूर’ उमटत असल्याच्या चर्चा राजकीय वर्तुळात वेगाने फिरू लागल्या आहेत.
वणीतील काही महिलांमध्ये डॉ. संचितांच्या प्रचाराला अपेक्षित ओढ मिळत नसल्याच्या चर्चा होत असून, त्यामागे त्यांच्या कुटुंबातील सदस्यांच्या रुग्णांशी वाटेल त्या भाषेत संवादशैलीबाबत स्थानिक पातळीवर नाराजी व्यक्त होत असल्याचे बोलले जात आहे. जरी या चर्चा अधिकृत नसल्या तरी चर्चेचा राजकीय परीघ मात्र मोठा होत आहे.
महाविकास आघाडीने नगराध्यक्ष पदासाठी मोठ्या थाटामाटात डॉ. नगराळे यांना पुढे केले असतानाच, महिला मतदारांचा उत्साह मात्र अपेक्षेइतका दिसत नसल्याचे स्थानिक जाणकारांचे मत. काही महिलांच्या म्हणण्यानुसार“आरोग्य सेवा क्षेत्रात अनुभव असला तरी लोकप्रतिनिधी म्हणून लोकाभिमुख संवाद महत्त्वाचा असतो.”यामुळे आघाडीच्या प्रचारयोजनेत थोडी धांदल उडाल्याचेही बोलले जात आहे.दरम्यान, या चर्चेमुळे विरोधकांनी मात्र संधी साधत “महिला मतदारांचा कल कुठे झुकतोय?” यावरून आघाडीवर टीकेची झोड उठवण्यास सुरुवात केली आहे.आगामी काही दिवसांत महाविकास आघाडी महिला गटाची नाराजी दूर करू शकेल का ?डॉ. संचितांचा प्रचार पुन्हा गती पकडेल का?याकडे वणीची राजकीय हवा आता उत्सुकतेने पाहत आहे.
